ഹെൽത്തിയായിരിക്കാൻ പഴങ്ങളും പച്ചക്കറികളും നന്നായി കഴുകുക; ശ്രദ്ധിക്കേണ്ടതെന്തെല്ലാം

കോവിഡ് കാലത്തിന് ശേഷം ആളുകള് ശുചിത്വത്തെയും വൃത്തിയെയും കുറിച്ച് കൂടുതല് ബോധവാന്മാരാണ്. പലരും ജീവിതശൈലിതന്നെ മാറ്റി. പുറത്തുപോയിവരുമ്പോള് കുളിക്കാന് ശീലിച്ചതുമുതല് കൊറിയര് ബോക്സുകള് വീട്ടില് വരുമ്പോള് അത് സാനിറ്റൈസ് ചെയ്യുന്നതില് വരെ നമ്മളിന്ന് ജാഗ്രതപുലര്ത്തുന്നു. ഈ വൃത്തി നമ്മുടെ അടുക്കളയിലേക്കും വ്യാപിച്ചിട്ടുണ്ട്. ഈ വൃത്തി കഴിക്കുന്ന ഭക്ഷണത്തിലും ഉണ്ടാവേണ്ടതുണ്ട്. നാം പുറത്തുനിന്ന് വാങ്ങുന്ന പച്ചക്കറികളും പഴങ്ങളും വൃത്തിയാക്കേണ്ടത് വളരെ അത്യാവശ്യമാണ്. പഴങ്ങളും പച്ചക്കറികളും വൈറ്റമിനുകളുടെ കലവറയാണ്. അങ്ങനെയാണെങ്കിലും കീടനാശിനികള് തളിച്ച് വരുന്നതുകൊണ്ട് അവയുടെ വൃത്തിയുടെ കാര്യത്തില് ജാഗ്രത പുലര്ത്തേണ്ടതുണ്ട്.

അമേരിക്കൻ വ്ളോഗറുടെ വീഡിയോ; വൈറലായി ചെന്നൈയിലെ ചിക്കൻ 65 കച്ചവടക്കാരനായ പിഎച്ച്ഡി വിദ്യാർത്ഥി

പഴങ്ങളും പച്ചക്കറികളും കഴുകുമ്പോള് ശ്രദ്ധിക്കേണ്ട കാര്യങ്ങള്

• അടുക്കളയിലെ സിങ്കും കഴുകാനുപയോഗിക്കുന്ന പാത്രങ്ങളും, കത്തിയും, പച്ചക്കറികള് മുറിക്കാനുപയോഗിക്കുന്ന കട്ടിംഗ് ബോര്ഡും എല്ലാം വൃത്തിയുള്ളതാണെന്ന് ഉറപ്പാക്കുക.

• കഴുകുമ്പോള് എല്ലാ പച്ചക്കറികളും ഒരുമിച്ച് കഴുകാന് ശ്രദ്ധിക്കുക. പച്ചക്കറികള് അല്പ്പസമയം വെളളത്തില് മുക്കിവയ്ക്കുക.

• പച്ചക്കറികള് വെള്ളം ഒഴുകിപോകുന്ന തരത്തിലുള്ള പാത്രത്തിലോ മറ്റോ ഇട്ട് ടാപ്പ് തുറന്നുവച്ച് നാലോ അഞ്ചോ തവണ കഴുകേണ്ടതാണ്. വെജിറ്റബിള് ബ്രഷ് ഉപയോഗിച്ചോ കൈകള് കൊണ്ടോ ഉരച്ച് വൃത്തിയാക്കാം.

• ഇലകള് പ്രത്യേകം കഴുകി വൃത്തിയാക്കേണ്ടതുണ്ട്. കോളിഫ്ളവര്, ക്യാബേജ് മുതലായവ ഉപ്പുവെള്ളത്തില് അല്പ്പസമയം ഇട്ട് വച്ച ശേഷം വീണ്ടും സാധാരണ വെളളത്തില് കഴുകി ഉപയോഗിക്കാം.

• പച്ചക്കറികള് വൃത്തിയാക്കി വെള്ളം വാര്ന്നുപോയി ജലാംശം ഇല്ലാതായ ശേഷം മാത്രം ഫ്രിഡ്ജില് സൂക്ഷിക്കാം. ഈര്പ്പമുണ്ടെങ്കില് ഫംഗസും ബാക്ടീയയും വികസിക്കുകയും വളരുകയും ചെയ്യും . അതുകൊണ്ട് വെളളം വലിഞ്ഞശേഷം ഫ്രിഡ്ജില് സൂക്ഷിക്കാം.

• ഓരോ പച്ചക്കറിയും വേര്തിരിച്ച് പ്രത്യേകം ബോക്സുകളിലായി നന്നായി അടച്ച് സൂക്ഷിക്കുന്നതാണ് നല്ലത്.

• കേടുവന്ന പച്ചക്കറികള് എടുത്ത് മാറ്റാന് ശ്രദ്ധിക്കണം. ഇല്ലെങ്കില് ബാക്ടീരിയകളും മറ്റും മറ്റ് പച്ചക്കറികളിലേക്ക് ബാധിക്കും.

• ക്യാബേജും, ലറ്റിയൂസും വാങ്ങുമ്പോള് അതിൻ്റെ പുറംപാളി നീക്കം ചെയ്യുക. ഉരുളക്കിഴങ്ങിന്റെയും ഉള്ളിയുടെയും തൊലി നമുക്ക് കളയാന് സാധിക്കുമെങ്കിലും പച്ചക്കറികള്ക്ക് അത്തരത്തിലുളള കവചമില്ലാത്തതുകൊണ്ട് കഴുകുമ്പോള് ഇവയുടെ പുറത്തെ ഇല നീക്കം ചെയ്യേണ്ടതാണ്.

• പച്ചക്കറികളും പഴങ്ങളുമൊക്കെ മാര്ക്കറ്റില്നിന്ന് വാങ്ങുമ്പോള് കഴിവതും പായ്ക്ക് ചെയ്തുവച്ചിരിക്കുന്നതിനേക്കാള് തുറന്ന് വച്ചിരിക്കുന്നവ വാങ്ങുന്നതാണ് ഗുണകരം. അന്നന്നത്തെ ആവശ്യത്തിനുളളത് വാങ്ങുന്നതാണ് കൂടുതല് നന്ന്. കൂടുതല് വാങ്ങി സൂക്ഷിക്കുന്നത് ആരോഗ്യകരമല്ല.

• പച്ചക്കറികളും പഴങ്ങളുമൊക്കെ വൃത്തിയാക്കുന്നതിന് മുന്പും ശേഷവും കൈകള് നന്നായി കഴുകി വൃത്തിയാക്കാന് ശ്രദ്ധിക്കുക.